Che rugò che ghè in sta piaza,
a sen vèt d’ogni culor e raza.
Un po’ besti e un po’ cristian,
a ghè semper gran bacan.
Taca prest a la matina,
quant che sona i prim campan.
In poeu i gat che taca lit, sedenò i can.
A l’è il moto camioncino
Che partiss pien de verdura,
ciamen: “ Pepo, cià el caret,
che l’è tardi già, sicura!”.
E l’Ambroeus chin amò i set:
“svelto moeuves su del let!”
Lasen foeura li per piaza e galin e pitalit,
pasa l’om cun la careta,
och e pegur e pegurit.
E lì sota a la tor vegia
ghè la pora cadregata
che lavora puereta
tut el dì cume una mata.
El magnan e poeu el muleta,
el spazin cun la careta,
anca poeu el scior tapezè,
fan ogun el so mestè.
Ma quand riva lì i fioeu
a giugà con la sua bala,
non ve disi che burdel
che fan giò poeu per ciapala!
L’è una fera, un quarantot
Che finis cui vedri rot.
L’è de moda la spurtiva,
ma andé giò un po’ anca a riva!
E poeu in mez a sta baraonda,
se sent anca un squil de tromba!
A l’è vun che voeu pruvà
se l’è bon amò de sunà!