Quel che suced al mè paes

I strecc strett de Belas

I strecc strett de Belas

Al mè paes tut i cà in tacà insema,
vuna su l’oltra, mè in ‘na scala pièna,
cun i tecc cuvert de cop e de sass,
cun sura i camit, amò, per scaldass.
El sò e el frecc i fan fadiga a pasà
in di strecc strett che ghin tra cà e cà.
El vent che el riva in de la piaza, spess
el giuga de scundòn cun i cipress,
che vuressen vanzà su del campanin,
ch’el tee d’oeucc tutt i tecc e i abain.
Pusè in volt i sgarissen i rondon
e al sò pè i bechetten i pevion.
Quand la campana granda la sona i or
se senten i rintocch e tasen i rumor.
Quand sona peu el mesdì tuc svolzen el cò
e pensen a quel che g’han de fa amò.
Quand che pasa un quei vun su la risciada
se sent i pass per tuta la cuntrada,
e se capiss dal frecass di so pè
se l’è adrèe a fa su i basei o el torna indrèe
De nocc i lamped tacà su sui cà,
quand ghe su el vent, i tachen a balà:
la lus che bala cun tuti i sò umbrii
la fa scapà can e gat un po’ stremì.
I se saluden tucc e nissun fa cas
a tucc i forestee che riven a Belas:
i fan i lor foto e i van in di butegh
e i seguten a esplurà el paes intregh.
Passen i dì, passen i mes, passen i an,
i passen svelt, ‘na quei volta, o anca pian,
nassen, cressen e passen omen e donn,
ma el mè paes minga el se scumponn.

3.11.2013



Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>