Quand mi seri pinin
me regordi che un dì
pasand rasent la riva
del lagh, nella scighera,
sota la gesa de Lescen,
hu vedù una prucession
de omen che naven
un pò trop de pressa,
coi so pedù de tela
e una longa gerla de sac,
un po’ pusé volta de lor,
un mantelit sora i spal,
in una quiett incantada
che se senteva dumò
l’onda fissa che lappava
i sasitt pusé pinit de la riva
sbrisigand sui pusé grand.
Sota quel pes eren tucc sudaa
e gh’aveven un fasulett ligà
su la front e la barba negra.
Pareven tanti poor Crist
che purtaven la lor cros.
M’han peu dì ch’eren “spallon”
che purtaven i lor bricoll.
Vardé un pò che mestè de can
faseven per purtà a cà el pan.

6 gennaio 2013